យោង​តាមក្រុមហ៊ុន​វិភាគទិន្នន័យ​ប្លុកឆេន Arkham បាន​រក​ឃើញ​ថា Bitcoin ប្រមាណ 45,000 កាក់ ដែល​មាន​តម្លៃ​ជិត $5 ពាន់​លាន​ដុល្លារ​អាមេរិក ពី​ករណី​គេហទំព័រ​លួចចម្លង Movie2K នៅ​តែ​មិន​ទាន់​ត្រូវ​បាន​រដ្ឋាភិបាល​អាល្លឺម៉ង់​រឹបអូស​បាន​នៅ​ឡើយ​ទេ។ ការ​រក​ឃើញ​នេះ​បាន​បង្ក​ឱ្យ​មាន​ការ​ជជែក​វែកញែក​យ៉ាង​ក្តៅ​គគុក​នៅ​ក្នុង​ប្រទេស​អាល្លឺម៉ង់​ថា តើ​រដ្ឋាភិបាល​គួរ​លក់ Bitcoin ទាំងនេះ​ចោល ឬ​ក៏​រក្សា​ទុក​ជា​ទុន​បម្រុង​ជាតិ​ដូច​ជា​មាស។ ការ​រក​ឃើញ​នេះ​បាន​ធ្វើ​ឱ្យ​សាធារណជន​ចាប់ផ្តើម​រិះគន់​ការ​សម្រេចចិត្ត​របស់​រដ្ឋាភិបាល​អាល្លឺម៉ង់ កាលពី​ឆ្នាំ 2024 ដែល​បាន​លក់ Bitcoin ជិត 50,000 កាក់​ក្នុង​តម្លៃ​ទាប​ត្រឹម​តែ $57,900 ដុល្លារ​អាមេរិក​ប៉ុណ្ណោះ។ ប្រសិនបើ​រដ្ឋាភិបាល​រក្សា​ទុក Bitcoin ទាំងនោះ​រហូត​ដល់​ពេល​បច្ចុប្បន្ន នោះ​ពួក​គេ​នឹង​បាន​ប្រាក់​ចំណេញ​ច្រើន​ជាង​នេះ​ទៅ​ទៀត។ ការ​រក​ឃើញ Bitcoin ថ្មី​នេះ​បាន​ពង្រីក​គម្លាត​តម្លៃ​នេះ​កាន់តែ​ធំ។ ការ​ជជែក​វែកញែក​បាន​កើត​មាន​ឡើង​រវាង​អ្នក​គាំទ្រ​ការ​រក្សា​ទុក​ជា​ទុន​បម្រុង ដែល​លើក​ឡើង​ថា Bitcoin គួរ​តែ​ត្រូវ​បាន​ដាក់​បញ្ចូល​ទៅក្នុង​រតនាគារ​ជាតិ​ដូច​មាស ខណៈ​អ្នក​ប្រឆាំង​ដូចជា​ប្រធាន​ធនាគារ​កណ្តាល​អាល្លឺម៉ង់ លោក Joachim Nagel បាន​លើក​ឡើង​ថា Bitcoin មាន​លក្ខណៈ​ប្រែប្រួល​ខ្លាំង មិនមាន​តម្លាភាព និង​អាច​ប៉ះពាល់​ដល់​ស្ថិរភាព​ហិរញ្ញវត្ថុ​របស់​រដ្ឋាភិបាល។

ខ្លឹមសារនៃគេហទំព័រនេះគឺសម្រាប់តែការចែករំលែកព័ត៌មាន និងចំណេះដឹងតែប៉ុណ្ណោះ ពួកយើងមិនធ្វើការផ្សព្វផ្សាយ ឬគាំទ្រសកម្មភាពប្រតិបត្តិការ និងការវិនិយោគណាមួយឡើយ។

- Camboswap