Neuralink ដែលជាក្រុមហ៊ុនបន្ទះឈីបខួរក្បាលគ្រប់គ្រងដោយ Elon Musk បានប្រកាសនៅថ្ងៃនេះថា ក្រុមហ៊ុនត្រូវបានអនុម័តដោយរដ្ឋបាលចំណីអាហារ និងឱសថសហរដ្ឋអាមេរិក (FDA) ដើម្បីធ្វើការសាកល្បងពិសោធន៍មនុស្សលើការបញ្ចូលបន្ទះឈីបសៀគ្វីទៅក្នុងខួរក្បាល។ Elon Musk ធ្លាប់បានបង្ហាញពីវីដេអូរបស់ក្រុមហ៊ុនបច្ចេកវិទ្យាសរសៃប្រសាទ Neuralink របស់គាត់ក្នុងឆ្នាំ 2021 ដែលអនុញ្ញាតឱ្យសត្វស្វាលេងហ្គេមតាមចិត្តរបស់ពួកគេដោយតាមបន្ទះឈីបសៀគ្វីក្នុងខួរក្បាលរបស់ពួកគេ។ បន្ទាប់ពីទទួលបានការចាប់អារម្មណ៍ជាសាធារណៈ លោក Elon Musk បានដាក់ពាក្យស្នើសុំទៅរដ្ឋបាលចំណីអាហារ និងឱសថអាមេរិក (FDA) ជាច្រើនដង ដោយសង្ឃឹមថានឹងចាប់ផ្តើមការពិសោធន៍ទៅលើមនុស្សឱ្យបានឆាប់តាមដែលអាចធ្វើទៅបាន ប៉ុន្តែត្រូវបានច្រានចោលជាច្រើនដង ដោយសារកត្តាសុវត្ថិភាព។ ប៉ុន្តែនៅថ្ងៃទី 26 ព្រឹកនេះ Neuralink បានបង្ហោះសារថាខ្លួនបានទទួលការយល់ព្រមពី FDA ជាផ្លូវការសម្រាប់ការសាកល្បងពិសោធន៍ទៅលើមនុស្សនៃការដាក់បន្ទះឈីបសៀគ្វីចូលទៅក្នុងខួរក្បាល។

តើបន្ទះឈីបខួរក្បាលរបស់ Neuralink អាចធ្វើអ្វីបាន? នៅក្នុងចក្ខុវិស័យរបស់ Neuralink តាមរយៈដាក់បន្ទះឈីបសៀគ្វីរបស់ Neuralink ចូលក្នុងខួរក្បាល អាចធ្វើអោយជនពិការអាចមើលឃើញឡើងវិញបាន ជនពិការមិនអាចកំរើកអាចទទួលបានភាពចល័តរបស់ពួកគេឡើងវិញដូចជាមនុស្សខ្វិន ហើយថែមទាំងអាចព្យាបាលជំងឺផាកឃីនសុន ភាពធាត់ ជំងឺធ្លាក់ទឹកចិត្ត ឬជំងឺវិកលចរិក...។ល។ វានឹងនាំមកនូវភាពប្រសើរឡើងយ៉ាងខ្លាំងក្នុងការថែទាំសុខភាពសាធារណៈ។ ទោះបីជាយ៉ាងណាក៏ដោយ អ្នកជំនាញផ្នែកវេជ្ជសាស្រ្តមួយចំនួនបានព្រមានថា នៅតែមានបញ្ហាសុវត្ថិភាពជាច្រើនដែលត្រូវជម្នះក្នុងដំណើរការបញ្ចូល ឬដាក់បន្ទះសៀគ្វីចូលក្នុងខួរក្បាល ហើយថាតើផ្នែកអេឡិចត្រូនិចនឹងប៉ះពាល់ដល់ខួរក្បាលដែលឬទេនៅតែត្រូវការការពិសោធន៍ជាច្រើន។ ទោះជាយ៉ាងណាក៏ដោយ Elon Musk បានលើកឡើងម្តងហើយម្តងទៀតនូវទំនុកចិត្តរបស់គាត់ចំពោះបច្ចេកវិទ្យា Neuralink ក្នុងរយៈពេលប៉ុន្មានឆ្នាំចុងក្រោយនេះ។ ថាតើគាត់អាចបង្កើតប្រវត្តិសាស្ត្រម្តងទៀតក្រោមការដឹកនាំរបស់គាត់ដែលឬទេយើងអាចធ្វើការរងចាំបន្ត។

ខ្លឹមសារនៃគេហទំព័រនេះគឺសម្រាប់តែការចែករំលែកព័ត៌មាន និងចំណេះដឹងតែប៉ុណ្ណោះ ពួកយើងមិនធ្វើការផ្សព្វផ្សាយ ឬគាំទ្រសកម្មភាពប្រតិបត្តិការ និងការវិនិយោគណាមួយឡើយ។

- Camboswap