តើ Bitcoin ជាអ្វី | What is Bitcoin ?
CamboSwap
2023-05-21
609 View
តើ Bitcoin ជាអ្វី ? ហើយវាបង្កើតឡើងដោយអ្នកណា និងមានប្រភពមកពីណា ? Bitcoin គឺជារូបិយប័ណ្ណឌីជីថលវិមជ្ឈការ ដែលមិនត្រូវបានគ្រប់គ្រងដោយធនាគារកណ្ដាល ឬអង្គភាពតែមួយ។ Bitcoin អាចត្រូវបានផ្លាស់ប្ដូរពីអ្នកប្រើប្រាស់មួយទៅអ្នកប្រើប្រាស់មួយ ដោយមិនមានការពាក់ព័ន្ធអន្តរការីណាមួយឡើយ។ រាល់ប្រតិបត្តិការដែលពាក់ព័ន្ធនឹង Bitcoin ត្រូវបានកត់ត្រានៅក្នុងសៀវភៅកត់ត្រាសាធារណៈ ហៅថា “ ប្លុកឆេន | Blockchain ” ។ Bitcoin ត្រូវបានគេបង្កើតឡើង កាលពីឆ្នាំ២០០៨ ក្រោមការផ្តួចផ្តើមគំនិតរបស់មនុស្សម្នាក់ (ឬក៏អាចជាមនុស្សមួយក្រុម) ដែលមានឈ្មោះថា Satoshi Nakamoto តែមកដល់ពេលបច្ចុប្បន្ននេះ គេនៅតែមិនទាន់ស្គាល់ច្បាស់នៅឡើយពីអត្តសញ្ញាណពិតប្រាកដរបស់ Satoshi Nakamoto ។ Bitcoin ត្រូវបានគេដាក់ឲ្យធ្វើចរាចរតាមប្រព័ន្ធអ៊ីនធឺណិតជាដំបូង នៅឆ្នាំ២០០៩ ដោយនៅពេលនោះ ១ប៊ីតខ័ញមានតម្លៃមិនដល់ ១សេនដុល្លារអាមេរិកផង។ ក៏ប៉ុន្តែ ប្រមាណជា ១០ ឆ្នាំក្រោយមក Bitcoin បានឡើងថ្លៃកប់ពពក ដោយ ១ Bitcoin មានតម្លៃដល់ ៦ ម៉ឺនដុល្លារអាមេរិក នៅខែវិច្ឆិកា ឆ្នាំ 2021 ហើយបានធ្លាក់ចុះមកនៅត្រឹមជាង ២ម៉ឺន៧ពាន់ដុល្លារ នៅខែឧសភា ឆ្នាំ 2023។
Bitcoin នាំមកនូវតម្លាភាពកាន់តែច្រើន ចំពោះទ្រព្យសកម្ម ដែលមិនត្រូវបានគ្រប់គ្រងដោយរដ្ឋាភិបាល ឬធនាគារណាមួយ ដូច្នេះហើយ ផ្ដល់សិទ្ធិឲ្យអ្នកនូវការគ្រប់គ្រង កាន់តែច្រើនលើការវិនិយោគ។ Bitcoin ត្រូវបានគេប្រើដើម្បីទិញអីវ៉ាន់អនាមិក ឬហៅថា អីវ៉ាន់អនឡាញ ។ លើសពីនេះទៀត ការចំណាយជាលក្ខណៈអន្តរជាតិមួយនេះមានភាពងាយស្រួល និងចំណាយតិច ពីព្រោះ Bitcoin មិនមែនជាកម្មសិទ្ធិរបស់ប្រទេសណាមួយឡើយ ។ អាជីវកម្មខ្នាតតូចមួយចំនួនចូលចិត្តប្រើប្រាស់ Bitcoin ដោយសារតែវាមិនតម្រូវឲ្យមានការចំណាយប្រចាំថ្ងៃ ដូចកាតឥណទាន ។ មនុស្សមួយចំនួនទិញ Bitcoin ទុកជាការវិនិយោគ ដោយសង្ឃឹមថា ពួកគេនឹងបានចំណេញនៅថ្ងៃក្រោយ។
