ប្រទេសថៃបានចាប់ខ្លួនប្ដីប្រពន្ធចិន2នាក់ជាប់ពាក់ព័ន្ធការបោកមនុស្សជាង 20ម៉ឺននាក់សរុបទឹកប្រាក់ 288លានដុល្លារ
CamboSwap
2023-06-03
302 View
ប្រភព: nationthailand
ប៉ូលិសថៃបានបើកប្រតិបត្តិការដាក់ឈ្មោះថា "Trust No One" មានគោលបំណងលុបបំបាត់ឧក្រិដ្ឋជននៅលើវិស័យរូបិយប័ណ្ណគ្រីបតូ។ ប៉ូលិសថៃបាននិយាយថា ប្តីប្រពន្ធជនជាតិចិនមួយគូត្រូវបានចាប់ខ្លួនកាលពីថ្ងៃអង្គារនៅផ្ទះវីឡាមួយក្នុងសង្កាត់ Prawet នៃទីក្រុងបាងកក ខណៈដែលពួកគេនៅពីក្រោយការឆបោកដែលអាចឆក់យកប្រាក់ជាង 10 ពាន់លានបាត (288 លានដុល្លារ) ពីជនជាតិថៃ និងជនបរទេស។
ប្រតិបត្តិការនេះត្រូវបានបញ្ជាដោយលោក Dang Longsa អគ្គស្នងការនគរបាលជាតិថៃ និងមន្ត្រីក្រោមឱវាទជាច្រើននាក់ រួមជាមួយនឹងការិយាល័យប្រឆាំងការលាងលុយកខ្វក់ថៃ ការិយាល័យអន្តោប្រវេសន៍ និងនាយកដ្ឋានផ្សេងៗទៀតរួមទាំង FBI ។ល។ ក្នុងប្រតិបត្តិការនេះ ប៉ូលិសបានឆែកឆេរទីតាំងផ្សេងៗរួមមានផ្លូវស៊ីណាការ៉ុន និងគ្រីថា ក្នុងទីក្រុងបាងកក។ ប្រតិបត្តិការនេះត្រូវបានចាប់ផ្តើមបន្ទាប់ពីជនរងគ្រោះបានប្តឹងទៅការិយាល័យស៊ើបអង្កេតឧក្រិដ្ឋកម្មតាមអ៊ីនធឺណិតថាឧក្រិដ្ឋជនបានទាក់ទាញពួកគេឱ្យវិនិយោគលើរូបិយប័ណ្ណគ្រីបតូក្លែងក្លាយ និងទ្រព្យសម្បត្តិផ្សេងទៀតហើយបានបាត់បង់ប្រាក់ជាង 35 លានបាតក្នុងការឆបោក។
ប៉ូលីសថៃបាននិយាយថា ចំនួនទឹកប្រាក់នៃឧក្រិដ្ឋកម្មដែលប្រព្រឹត្តអាចលើសពី ១០ ពាន់លានបាត (288 លានដុល្លារ) ហើយចំនួនជនរងគ្រោះមានដល់ជាង ២០ ម៉ឺននាក់ ប៉ុន្តែចំនួនជាក់លាក់នៅមិនទាន់មាននៅឡើយទេ ព្រោះនៅមានជនរងគ្រោះផ្សេងទៀត។ បន្ថែមពីលើនេះ ប៉ូលីសក៏បានឆែកឆេររកឃើញជនសង្ស័យចំនួន១៦ផ្សេងទៀត ពាក់ព័ន្ធទៅនឹងមនុស្ស២នាក់ខាងលើ នៅតំបន់ផ្ទះវីឡា។ ជាបឋមប៉ូលិសថៃបានរឹបអូសបានលុយជាង១,៥លានបាតតាមអាស័យដ្ឋាន ព្រមទាំងដីដែលមានតម្លៃជាង១៨០លានបាត តុក្កតា Bearbrick ១៤គ្រឿង ទូរស័ព្ទ iPhone ៦គ្រឿង iPad កុំព្យូទ័រ MacBook មួយគ្រឿង និងកាបូបប្រណីត ។ ប្តីប្រពន្ធជនជាតិចិនដែលមានអាយុ 31 និង 25 ឆ្នាំត្រូវបានចោទប្រកាន់ពីបទប្រតិបត្តិការឆបោកវិនិយោគតាមអ៊ីនធឺណិត និងការលាងលុយ។
ទោះជាយ៉ាងណាក៏ដោយ អ្វីដែលប្រាកដនោះគឺថា ទិសដៅនៃការបង្រ្កាបការក្លែងបន្លំរបស់ប្រទេសថៃបានផ្លាស់ប្តូរពីឧស្សាហកម្មធម្មតាទៅឧស្សាហកម្មគ្រីបតូ និងពីការបង្រ្កាបក្រៅបណ្តាញទៅការតាមដានតាមអ៊ីនធឺណិត។ យោងតាមរបាយការណ៍របស់ប្រព័ន្ធផ្សព្វផ្សាយក្នុងស្រុក គូស្នេហ៍ជនជាតិចិនដែលបានប្រព្រឹត្តការក្លែងបន្លំក្នុងករណីនេះស្ទើរតែមិនមាននរណាកត់សម្គាល់ពីមុនមក ប៉ុន្តែពួកគេបានបង្កើតការឆបោកដ៏ធំគួរឱ្យភ្ញាក់ផ្អើលដែលត្រូវបានលាក់រហូតមកដល់បច្ចុប្បន្ន។ "Trust No One" គឺជាប្រធានបទ និងគោលបំណងនៃប្រតិបត្តិការរបស់ប៉ូលីសថៃលើកនេះ ក្នុងគោលបំណងបំផ្លាញ “ខ្នងបង្អែក” របស់ក្រុមឧក្រិដ្ឋជនទាំងអស់។
